জুবিন গাৰ্গৰ হত্যাকাণ্ডৰ গোচৰত আজি এক গুৰুত্বপূৰ্ণ শুনানি হয়। এই শুনানিৰ সময়ত আদালতে এক ডাঙৰ নিৰ্দেশনা জাৰি কৰি শ্যামকানু মহন্তৰ ফ্ৰিজ কৰি থোৱা বেংক একাউণ্টটো খুলি দিবলৈ নিৰ্দেশ দিয়ে।
আদালতৰ মতে, বেংক একাউণ্ট ফ্ৰিজ কৰাৰ ক্ষেত্ৰত ভাৰতীয় নাগৰিক সুৰক্ষা সংহিতা (BNSS)ৰ ধাৰা ১০৭ সঠিকভাৱে মানি চলা হোৱা নাছিল। এই প্ৰক্ৰিয়াগত ত্ৰুটিৰ বাবেই আদালতে শ্যামকানু মহন্তক সকাহ প্ৰদান কৰি তেওঁৰ বেংক একাউণ্ট পুনৰ কাৰ্যক্ষম কৰাৰ নিৰ্দেশ দিয়ে।
সিদ্ধাৰ্থ শৰ্মাৰ কৰ’নাৰ্ছ ৰিপ’ৰ্ট প্ৰসংগ
একেটা শুনানিতে সিদ্ধাৰ্থ শৰ্মাৰ ছিংগাপুৰৰ কৰ’নাৰ্ছ (coroner’s) প্রতিবেদন দাখিল কৰা প্ৰসংগটোও চৰ্চালৈ আহে। আৰক্ষীয়ে ইতিমধ্যে ছিংগাপুৰৰ পৰা বহুতো নথি-পত্ৰ সংগ্ৰহ কৰি অভিযোগনামাৰ লগত দাখিল কৰিছে বুলি আদালতক জনায়।
অৱশ্যে, এইক্ষেত্ৰত এক আইনী দিশো পোহৰলৈ আহে। বিদেশৰ পৰা নথি-পত্ৰ আনিবলৈ BNSS-এ আদালতক পোনপটীয়াভাৱে ক্ষমতা প্ৰদান নকৰে। তাৰ বাবে ভাৰত চৰকাৰৰ জৰিয়তেহে আবেদন কৰিব পৰা যায়।
পৰৱৰ্তী শুনানি ১৯ মাৰ্চত
আদালতে এই গোচৰৰ সৈতে জড়িত কেইবাটাও বিষয়ৰ পৰৱৰ্তী শুনানিৰ দিন ধাৰ্য কৰিছে। সিদ্ধাৰ্থ শৰ্মাৰ ‘মহাবীৰ একুৱা’ সন্দৰ্ভত শুনানি ১৯ মাৰ্চত অনুষ্ঠিত হ’ব। একেদিনাই জুবিন গাৰ্গৰ হত্যাৰ গোচৰৰো পৰৱৰ্তী শুনানি গ্ৰহণ কৰা হ’ব। সকলোৰে দৃষ্টি এতিয়া ১৯ মাৰ্চৰ ওপৰত নিবদ্ধ হৈ আছে।
